RCL VP NEWS 28-09-2021
Familia hamutuk ho Conselu Combatentes da Libertasaun Nasional, no Autoridade Lokal Iha Municipiu Lautem segunda feira loraik (27-09-2021) halot ona Saudozu Euriko Rosario dos Santos ho kodigo Iku Junick iha Jardim dos Herois da Patria nebe Lokaliza Iha Aldeia Asalaino , Suku Fuiloru Posto Administrativu Lospalos Municipiu Lautem.
Saudozu Iku Junick moris iha Suku Mehara iha loron 4 fulan Setembro Tinan Rihun Ida Atus Sia Lima Nolu Resin Sia (4/09/1959) oan husi Aman Lamberto dos Santos no inan Silviana do Rosario ,Saudozu husik ona oan kiak hamutuk nain 7 kompostu husi Mane Nain 2 no Feto Nain 5 .
Saudozu hakotu i’is iha loron 23 de setembro tinan 2021 maijumenus tuku 4 ho balum iha Sala Ijolamento Lahane dili tamba Moras komplikado no pozitivo Covid-19.
Oan faluk Carmonia Abrilia Rosario ba Jornalista RCL iha Jardin dos herois da patria Municipio Lautem Segunda Feira loraik ne’e hateten katak , nudar oan sente triste tamba lakon aman diak ida iha sira nia le’et , ho nune’e nia parte husu ba Governu ga estado atu tau matan ba feto faluk no oan kiak sira nia moris liu-liu oan kiak sira nia estudu.
” hau sente triste tamba apa mos mane mesak deit, depois ama mos ferik tiha ona maibe apa mos husik ami sedu deit , ami sente todan tebes ba ami oan kiak sira, Ami maun alin nain 7 feto 5 no mane 2, ami hot-hotu sei eskola, ami nain 3 eskola iha universidade, agora ami seidauk hanoin ba ida ne’e tamba foin mak ami nia apa husik ami, maibe ba futuru karik Estado hanoin ami karik bele tau matan ba feto faluk no ami oan kiak sira nia eskola tamba durante ne’e ami nia papa mak hare ami nia eskola,” hateten oan kiak ba jornalista RCL iha Jardim herois da patria Lautem Assalaino segunda feira loraik ne’e.
Iha sorin seluk Reprezentante familia Ze Meigo Neto haktuir tan katak Saudozu Iku Junick ne’e mos heroi ida ne’ebe fo a’an duni ba Luta Libertasaun Nasional , tan ne’e husu ba Governu no Estado atu bele tau matan ba Oan kiak no Feto faluk ne’ebe hafunu hela matan ween tamba lakon aman diak ida , no mos familia sente triste no lamenta ba desijaun husi parte saude sira nian katak saudozu hetan pozitivu kovid19 maibe familia nafatin pronto hodi simu desijaun refere.
” Ami nia Maun, Ami nia Belum, Ami nia Tiun, Ami nia Aman ida ne’e,mos heroi ida, sakrificio nebe Nia halo sai lakon le’et deit ona, maibe ami husu karik ba futuru bele tau matan ba oan kiak no faluk nebe agora tur hela iha ita nia oin,ho triste tamba lakon aman lakon laen iha situasaun nebe difisil tebes , maibe ami pronto kopera no ami simu buat nebe Estado deside, iha buat balum nebe ami lamenta tebes maibe ida ne’e mak realidade katak iha situasaun balum nebe konfortavel, ami rekomenda ga sujere atu la bele akontece tan ba nia maluk sira nebe mak sei moris,” nia haktuir.
Prezidente Conselho Combatentes da Libertasaun Nasional Municipu Lautem , Aurelio Freitas Ribeiro hateten katak,Saudozu iku ne’e mos ema rezistensia ida no kontribui makas ba Luta Libertasaun Nasional Durante tinan 24 iha ailaran , ho nune’e Estado iha obrigatorio hodi tau matan ba oan kiak no feto faluk sira inklui mos veteranos sira nebe sei moris,” Aurelio deklara.
Administrador Municipiu Lautem , Domingos Savio hateten katak, Saudozu iku ne’e hanesan heroi Nasional la’os heroi ema ida nian deit maibe ne’e horoi nasaun nian tamba ne’e ,mai ita luta hamutuk hodi lori feto faluk no oan kiak inklui veteranos sira hotu ba tau iha fatin nebe digno no hetan moris diak tamba sira merece atu hetan moris diak.
Entertanto : .serimonia funebre ba saudozu iku junick nebe organiza iha jardim dos herois da Patria Asalaino ne’e la’o diak tamba hetan partisapasaun maximu husi komunidade familia ,Membro PNTL ,membro f-FDTL , Consellho Veteranos , Governo lokal no entidades sira iha Municipiu Lautem.
Jornalista:ito&jack
Editor:Nascimento Provincial
